SERIKALI YAITAKA TIGO KUFIKA VIJIJINI

SERIKALI mkoani Kilimanjaro imetaka kampuni ya simu za mkononi ya Tigo, kuunga jitihada za kukuza uchumi wa mkoa huo kwa kufikisha mtandao wake maeneo ya kibiashara.

Pamoja na kukuza uchumi, lakini pia mtandao huo umetakiwa kujaribu kuweka fursa za elimu ili wanafunzi wa shule za sekondari na vyuo vikuu kupata taarifa zitakazosaidia kukuza taaluma.

Mkuu wa Mkoa huo, Leonidas Gama alisema hayo wakati anafungua duka la Tigo mkoani hapa, ambalo litakuwa likihudumia wateja 250 kila siku.

Alisema mkoa huo una fursa za kibiashara, hivyo kuna kila sababu kwa kampuni kuitumia ili kuwaunganisha wafanyabiashara wa mjini na vijijini kuweza kuuza na kununua bidhaa mbalimbali.

"Mfano wilaya ya Rombo ipo mpakani na Kenya, kuna uwezekano wa wafanyabiashara kununua na kusambaza bidhaa kama  hakuna mtandao ni vigumu biashara kufanyika na hiyo haitakuza uchumi," alisema.

Mkuu wa mkoa alisema kuwapo kwa mitandao ya simu, kunasaidia kupunguza matukio ya uhalifu, kwani wananchi hususan wafanyabiashara husafirisha fedha kupitia Tigo-Pesa na mingineyo.

Awali, Meneja Ubora wa Huduma kwa Wateja, Mwangaza Matotola alisema duka hilo litatoa huduma za intaneti, kadi za simu, kuuza kadi za muda wa hewani na huduma za kifedha.

"Duka hili litatoa pia huduma katika maeneo jirani kama Uru, Kibosho na  Marangu wilaya ya Moshi  Vijijini na Bomang'ombe wilaya ya Hai," alisema