RAIS MAGUFULI AFUTA SHEREHE ZA UHURU ZA MWAKA HUU, SIKU HIYO KUTUMIKA KUFANYA USAFI

 

Na Mwandishi Wetu, Katuma Blog tz

RAIS John Magufuli amefuta rasmi sherehe za miaka 54 ya Uhuru zinazotarajiwa kufanyika Desemba 9, mwaka huu, na badala yake kuagiza siku hiyo iadhimishwe kwa mtindo wa kufanya usafi ili kudhibiti ugonjwa wa Kipindupindu.

Agizo hilo, lilitolewa jijini Dar es Salaam jana na Katibu Mkuu Kiongozi, Balozi Ombeni Sefue, wakati akizungumza na uongozi wa hospitali ya taifa ya Muhimbili (MHN) na waandishi wa habari.

 

Alisema ugonjwa  wa Kipindupindu chanzo chake kikubwa ni uchafu, hali inayoonyesha kuwa bado Tanzania kuna haja kubwa ya kushughulikia uchafu ili kuondokana na magonjwa ya mlipuko kama kipindupindu.

“Kwa mujibu wa Rais Magufuli, siku ya Desemba 9, ambayo kila mwaka Tanzania husherehekea kama Siku iliyopata Uhuru wake, badala ya kushuhudia shamrashamra za magwaride, halaiki na ndege za kivita kama ilivyozoeleka, badala yake wananchi wote watasafisha mazingira,” alisisitiza Sefue.

Aliwataka Wakuu wa Mikoa, wakuu wa wilaya, wakurugenzi wa halmashauri na makatibu tawala wote nchini, kuanza kujiandaa na kuweka mikakati ya namna ya kufanya usafi huo katika maeneo yao ikiwa ni pamoja na kuandaa vifaa vya kusafishia mazingira.

Alisema gharama zitakazotumika kwa ajili ya maandalizi ya sherehe hizo, rais Magufuli, atazipeleka katika maeneo mengine yatakakuwa na mahitaji.

Alisema kwa mujibu wa Dk Magufuli, hataki kusikia baada ya Desemba kuna mgonjwa wa kipundipundu sehemu na kwamba endapo kutakuwa na mgonjwa anayesumbuliwa na ugonjwa huo, mkoa husika uongozi wake watawajibika na kujieleza.