CHIKU ABWAO KUPEPERUSHA BENDERA YA ACT KUKABILIANA NA MCHUNGAJI MSIGWA IRINGA MJINI

MBUNGE wa Viti Maalumu Chadema, Chiku Abwao ndiye atakayepeperusha bendera ya ACT kuwania ubunge wa Jimbo la Iringa mjini katika uchaguzi mkuu ujao, huku akitamba atambwaga mbunge anayemaliza muda wake, Mchungaji Peter Msigwa (Chadema).

Mbali na Abwao aliyejiunga na ACT Wazalendo hivi karibuni, Mjumbe wa Mkutano Mkuu wa Taifa wa Chadema, Abuu Changawa (Majeki) naye amekiacha Chadema na kujiunga ACT Wazalendo.

Akizungumza jana, Abwao aliyewahi kuwa mbunge wa NCCR-Mageuzi, alisema; “nimeondoka Chadema baada ya kubanwa kila kona na Mchungaji Msigwa akidhani kwamba mimi nilikuwa Chadema kwa sababu ya kutaka cheo.” 

Akizungumzia sababu zilizomtoa Chadema na kumpeleka ACT Wazalendo, Majeki alisema; “katika uchaguzi mkuu wa 2010 yapo mengi yaliahidiwa na mbunge anayemaliza muda wake Mchungaji Msigwa lakini hayakutekelezwa.”